Aaj tum yaad be-hisaab aaye
Na gayi tere gham ki sardaari
Dil mein yun roz inqilaab aaye
Jal uthe bazm-e ghair ke dar-o baam
Jab bhi hum khaanumaan kharaab aaye
Iss tarah apni khamoshi goonji
Goya har simt se jawaab aaye
Faiz thi raah sar basar manzil
Hum jahan pahunche kaamiyaab aaye
~
20. Zindaan Ki Ek Shaam
Shaam ke pech-o kham sitaaron se
Zeena zeena utar rahi hai raat
Yun saba paas se guzarti hai
Jaise keh di kisi ne pyaar ki baat
Sehn-e zindaan ke be-watan ashjaar
Sar nigun mahv hain banaane mein
Daaman-e aasmaan pe naqsh-o nigaar
Shaana-e baam par damakta hai
Meherbaan chaandni ka dast-e jameel
Khaak mein ghul gayi hai aab-e nujoom
Noor mein ghul gaya hai arsh ka neel
Sabz goshon mein neelgoon saaye
Lahlahaate hain jis tarah dil mein
Mauj-e dard-e firaaq-e yaar aaye
Dil se paiham khayaal kehta hai
Itni sheereen hai zindagi iss pal
Zulm ka zahr gholne waale
Kaamraan ho sakenge aaj na kal
Jalva gaah-e wisaal ki shamaein
Woh bujha bhi chuke agar toh kya
Chaand ko gul karein toh hum jaanein
~
21. Zindaan Ki Ek Subh
Raat baaki thi abhi jab sar-e baaleen aakar
Chaand ne mujhse kaha
Jaag seher aayi hai
Jaag iss shab jo mai-e khwaab tera hissa thi
Jaam ke lab se tah-e jaam utar aayi hai
Aks-e jaanaan ko vida karke uthi meri nazar
Shab ke thehre huwe paani ki siyah chaadar par
Ja ba ja raqs mein aane lage chaandi ke bhanwar
Chaand ke haath se taaron ke kanwal gir gir kar
Doobte tairte murjhaate rahe khilte rahe
Raat aur subh bahut der gale milte rahe
Sehn-e zindaan mein rafeeqon ke sunehre chehre
Sath-e zulmat se damakte huwe ubhre kam kam
Neend ki os ne unn chehron se dho daala tha
Des ka dard firaaq-e rukh-e mehboob ka gham
Door naubat hui phirne lage bezaar qadam
Zard faaqon ke sataaye huwe pehre waale
Ahl-e zindaan ke ghazabnaak kharoshaan naale
Jinki baahon mein phira karte hain baahein daale
Lazzat-e khwaab se makhmoor hawaein jaagin
Jail ki zahr bhari choor sadaein jaagin
Door darwaaza khula koi koi band hua
Door machli koi zanjeer machal ke royi
Door utra kisi taale ke jigar mein khanjar
Sar patakne laga reh reh ke dareecha koi
Goya phir khwaab se bedaar huwe dushman-e jaan
Sang-o faulaad se dhaale huwe jinnaat-e giraan
Jinke changul mein shab-o roz hain fariyaad kunaan
Mere bekaar shab-o roz ki naazuk pariyaan
Apne shahpoor ki raah dekh rahi hain yeh aseer
Jiske tarkash mein hain ummeed ke jalte huwe teer
(Na tamaam)
~
22. Yaad
Dasht-e tanhaai mein ay jaan-e jahaan larzaan hain
Teri aawaaz ke saaye tere honton ke saraab
Dasht-e tanhaai mein doori ke khas-o khaak taley
Khil rahe hain tere pahlu ke saman aur gulaab
Uth rahi hai kahin qurbat se teri saans ki aanch
Apni khushbu mein sulagti hui maddham maddham
Door ufaq paar chamakti hui qatra qatra
Gir rahi hai teri dildaar nazar ki shabnam
Iss qadar pyaar se ay jaan-e jahaan rakkha hai
Dil ke rukhsaar pe iss waqt teri yaad ne haath
Yun gumaan hota hai garche hai abhi subh-e firaaq
Dhal gaya hijr ka din aa bhi gayi wasl ki raat
~
23. Mulaqaat
(1)
Yeh raat uss dard ka shajar hai
Jo mujhse tujhse azeem tar hai
Azeem tar hai ki iss ki shaakhon
Mein laakh mashal bakaf sitaaron
Ke kaarwaan ghir ke kho gaye hain
Hazaar mehtaab iske saaye
Mein apna sab noor ro gaye hain
Yeh raat uss dard ka shajar hai
Jo mujhse tujhse azeem tar hai
Magar issi raat ke shajar se
Yeh chand lamhon ke zard patte
Gire hain aur tere gesuon mein
Ulajh ke gulnaar ho gaye hain
Issi ki shabnam se khamoshi ke
Yeh chand qatre teri jabeen par
Baras ke heere piro gaye hain
(2)
Bahut siyah hai yeh raat lekin
Issi siyaahi mein roonuma hai
Woh nahr-e khoon jo meri sada hai
Issi ke saaye mein noor gar hai
Woh mauj-e zar jo teri nazar hai
Woh gham jo iss waqt teri baahon
Ke gulsitaan mein sulag raha hai
(Woh gham jo iss raat ka samar hai)
Kuchh aur tap jaaye apni aahon
Ki aanch mein toh yehi sharar hai
Har ik siyah shaakh ki kamaan se
Jigar mein toote hain teer jitne
Jigar se noche hain aur har ik
Ka humne teesha bana liya hai
(3)
Alam naseebon jigar figaaron
Ki subh aflaak par nahin hai
Jahan pe hum tum khade hain donon
Seher ka raushan ufuq yahin hai
Yahin pe gham ke sharaar khil kar
Shafaq ka gulzaar ban gaye hain
Yahin pe qaatil dukhon ke teeshe
Qataar andar qataar kirnon
Ke aatisheen haar ban gaye hain
Yeh gham jo iss raat ne diya hai
Yeh gham seher ka yaqeen bana hai
Yaqeen jo gham se kareem tar hai
Seher jo shab se azeem tar hai
~
24. Kab Yaad Mein Tera Saath Nahin
Kab yaad mein tera saath nahin kab haath mein tera haath nahin
Sad shukr ki apni raaton mein ab hijr ki koi raat nahin
Mushkil hain agar haalaat wahan dil bech aayein jaan de aayein
Dil waalon koocha-e jaanaan mein kya aise bhi haalaat nahin
Jis dhaj se koi maqtal mein gaya woh shaan salaamat rehti hai
Yeh jaan toh aani jaani hai iss jaan ki toh koi baat nahin
Maidaan-e wafa darbaar nahin yahan naam-o nasab ki poochh kahan
Aashiq toh kisi ka naam nahin kuchh ishq kisi ki zaat nahin
Gar baazi ishq ki baazi hai jo chaaho laga do dar kaisa
Gar jeet gaye toh kya kehna haare bhi toh baazi maat nahin
~
25. Ay Raushniyon Ke Shahr
Sabza sabza sookh rahi hai pheeki zard dopahr
Deewaaron ko chaat raha hai tanhaai ka zahr
Door ufuq tak ghat-ti badhti uth-ti girti rehti hai
Kohr ki soorat be-raunaq dardon ki gadli lahr
Basta hai iss kohr ke peechhe raushniyon ka shahr
Ay raushniyon ke shahr
Kaun kahe kis simt hai teri raushniyon ki raah
Har jaanib be-noor khadi hai hijr ki shahr panaah
Thak kar har su baith rahi hai shauq ki maand sipaah
Aaj mera dil fikr mein hai
Ay raushniyon ke shahr
Shab khoon se munh pher na jaaye armaanon ki rau
Khair ho teri lailaon ki un sab se keh do
Aaj ki shab jab diye jalaayein oonchi rakkhein lau
~
26. Kuchh Mohtasibon Ki Khalwat Mein
Kuchh mohtasibon ki khalwat mein kuchh waa’iz ke ghar jaati hai
Hum baadakashon ke hisse ki ab jaam mein kam tar jaati hai
Yun arz-o talab se kab ay dil patthar dil paani hote hain
Tum laakh raza ki khu daalo kab khu-e sitamgar jaati hai
Bedaad garon ki basti hai
yahan daad kahan khairat kahan
Sar phodti phirti hai nadaan fariyaad jo dar dar jaati hai
Haan jaan ke ziyaan ki hum ko bhi tashweesh hai lekin kya kije
Har rah jo udhar ko jaati hai maqtal se guzar kar jaati hai
Ab koocha-e dilbar ka rahrau rahzan bhi bane toh baat bane
Pehre se adu talte hi nahin aur raat baraabar jaati hai
Hum ahl-e qafas tanha bhi nahin har roz naseem-e subh-e watan
Yaadon se mu’attar aati hai ashkon se munawwar jaati hai
~
27. Koi Aashiq Kisi Mehbooba Se
Yaad ki raahguzar jis pe issi soorat se
Muddatein beet gayi hain tumhein chalte chalte
Khatm ho jaaye jo do chaar qadam aur chalo
Mod padta hai jahaan dasht-e faraamoshi ka
Jis se aage na koi main hun na koi tum ho
Saans thaame hain nigaahein ki na jaane kis dum
Tum palat aao guzar jao ya mud kar dekho
Garche waaqif hain nigaahein ki yeh sab dhokha hai
Gar kahin tumse hum-aaghosh hui phir se nazar
Phoot niklegi wahan aur koi raahguzar
Phir issi tarah jahan hoga muqaabil paiham
Saaya-e zulf ka aur jumbish-e baazu ka safar
Doosri baat bhi jhoothi hai ki dil jaanta hai
Yahan koi mod koi dasht koi ghaat nahin
Jiske parde mein mera maah-e rawaan doob sake
Tumse chalti rahe yeh raah yun hi achchha hai
Tumne mud kar bhi na dekha toh koi baat nahin
~
28. Dast-e Tah-e Sang Aamdah
Bezaar fiza dar pa-e aazaar saba hai
Yun hai ki har ik humdum-e dereena khafa hai
Haan bada kasho aaya hai ab rang pe mausam
Ab sair ke kaabil rawish-e aab-o hawa hai
Umdi hai har ik simt se ilzaam ki barsaat
Chhaayi hui har daang malaamat ki ghata hai
Woh cheez bhari hai ki sulagti hai suraahi
Har kaasa-e mai zahr-e halaahal se siwa hai
Haan jaam uthao ki ba yaad-e lab-e sheereen
Yeh zahr toh yaaron ne kayi baar piya hai
Iss jazba-e dil ki na saza hai na jaza hai
Maqsood-e rah-e shauq wafa hai na jafa hai
Ehsaas-e gham-e dil jo gham-e dil ka sila hai
Uss husn ka ehsaas hai jo teri ata hai
Har subh-e gulistaan hai tera ru-e bahaarin
Har phool teri yaad ka naqsh-e kaf-e pa hai
Har bheegi hui raat teri zulf ki shabnam
Dhalta hua sooraj tere honton ki fiza hai
Har raah pahunchti hai teri chaah ke dar tak
Har harf-e tamanna tere qadmon ki sada hai
Taazeer-e siyaasat hai na ghairon ki khata hai
Woh zulm jo humne dil-e wahshi pe kiya hai
Zindaan-e raah-e yaar mein paaband huwe hum
Zanjeer bakaf hai na koi band bapa hai
‘Majboori-o daawa-e giriftaari-e ulfat
Dast-e tah-e sang aamdah paimaan-e wafa hai’
~
29. Jamegi Kaise Bisaat-e Yaaraan Ki Sheesha-o Jaam Bujh Gaye Hain
Jamegi kaise bisaat-e yaaraan ki sheesha-o jaam bujh gaye hain
Sajegi kaise shab-e nigaaraan ki dil sar-e shaam bujh gaye hain
Woh teergi hai raah-e butaan mein charaagh-e rukh hai na shamm-e waada
Kiran koi aarzu ki laao ki sab dar-o baam bujh gaye hain
Bahut sambhaala wafa ka paimaan magar woh barsi hai ab ke barkha
Har ek iqraar mit gaya hai tamaam paighaam bujh gaye hain
Kareeb ay mah-e shab-e gham nazar pe khulta nahin kuchh iss dum
Ki dil pe kis kis ka naqsh baaki hai kaun se naam bujh gaye hain
Bahaar ab aake kya karegi ki jin se tha jashn-e rang-o naghma
Woh gul sar-e shaakh jal gaye hain woh dil tah-e daam bujh gaye hain
~
30. Be-dum Huwe Bimaar Dawa Kyun Nahin Dete
Be-dum huwe bimaar dawa kyun nahin dete
Tum achchhe maseeha ho shifa kyun nahin dete
Dard-e shab-e hijraan ki jaza kyun nahin dete
Khoon-e dil-e wahshi ka sila kyun nahin dete
Mit jaayegi makhlooq toh insaaf karoge
Munsif ho toh ab hashr utha kyun nahin dete
Haan nukta varo laao lab-o dil ki gavaahi
Haan naghma garo saaz sada kyun nahin dete
Paimaan-e junoon haathon ko sharmaayega kab tak
Dil waalon garibaan ka pata kyun nahin dete
Barbaadi-e dil jabr nahin Faiz kisi ka
Woh dushman-e jaan hai toh bhula kyun nahin dete
~
31. Zindagi
Malka-e seher-e zindagi tera shukr kis taur se ada kije
Daulat-e dil ka kuchh shumaar nahin tang dasti ka kya gila kije
Jo tere husn ke faqir huwe unko tashweesh-e rozgaar kahan
Dard bechenge geet gaayenge isse khush waqt kaarobaar kahan
Jaam chhalka toh jam gayi mehfil minnat-e lutf-e gham-gusaar kise
Ashk tapka toh khil gaya gulshan ranj-e kam-zarfi-e bahaar kise
Khush nasheen hain ki chashm-o dil ki muraad dair mein hai na khaanqaah mein hai
‘Hum kahan qismat azmaane jaayein’ har sanam apni baargaah mein hai
Kaun aisa ghani hai jisse koi naqd-e shams-o qamar ki baat kare
Jisko shauq-e nabard ho humse jaaye taskheer-e kayanaat kare
~
32. Tere Gham Ko Jaan Ki Talaash Thi
Tere gham ko jaan ki talaash thi tere jaan nisaar chale gaye
Teri rah mein karte thhe sar talab sar-e raahguzaar chale gaye
Mere zabt-e haal se rooth kar mere ghamgusaar chale gaye
Na sawaal-e wasl na arz-e gham na hikaayatein na shikaayatein
Tere ahd mein dil-e zaar ke sabhi ikhtiyaar chale gaye
Yeh humin thhe jin ke libaas par sar-e raah siyaahi likhi gayi
Yahi daagh thhe jo saja ke hum sar-e bazm-e yaar chale gaye
Na raha junoon-e rukh-e wafa yeh rasan yeh daar karoge kya
Jinhein jurm-e ishq pe naaz tha woh gunahgaar chale gaye
~
33. Khatm Hui Baarish-e Sang
Naagahaan aaj mere taar-e nazar se kat kar
Tukde tukde huwe aafaaq pe khursheed-o qamar
Ab kisi simt andhera na ujaala hoga
Bujh gayi dil ki tarah raah-e wafa mere baad
Doston qaafila-e dard ka ab kya hoga
Ab koi aur kare parwarish-e gulshan-e gham
Doston khatm hui deeda-e tar ki shabnam
Tham gaya shor-e junoon khatm hui baarish-e sang
Khaak-e rah aaj liye hai lab-e dildaar ka rang
Ku-e jaanaan mein khula mere lahu ka parcham
Dekhiye dete hain kis kis ko sada mere baad
‘Kaun hota hai harif-e mai-e mard afgan-e ishq’
Hai mukarrar lab-e saaqi pe sila mere baad
~
34. Rang Hai Dil Ka Mere
Tum na aaye thhe toh har ek cheez wahi thi ki jo hai
Aasmaan hadd-e nazar raahguzar raahguzar sheesha-e mai sheesha-e mai
Aur ab sheesha-e mai raahguzar rang-e falak
Rang hai dil ka mere ‘khoon-e jigar hone tak’
Champayi rang kabhi raahat-e deedar ka rang
Surmayi rang ki hai sa’at-e bezaar ka rang
Zard patton ka khas-o khaar ka rang
Surkh phoolon ka dehekte huwe gulzaar ka rang
Zahr ka rang lahu rang shab-e taar ka rang
Aasmaan raahguzaar sheesha-e mai
Koi bheega hua daaman koi dukhti hui rag
Koi har lahza badalta hua aaina hai
Ab jo aaye ho toh thehro ki koi rang koi rut koi shai
Ek jagah par thehre
Phir se ik baar har ik cheez wahi ho ki jo hai
Aasmaan hadd-e nazar raahguzar raahguzar sheesha-e mai sheesha-e mai
~
35. Paas Raho
Tum mere paas raho
Mere qaatil mere dildaar mere paas raho
Jis ghadi raat chale
Aasmaanon ka lahu peeke siyah raat chale
Marham-e mushk liye nashtar-e almaas liye
Bain karti hui hansti hui gaati nikle
Dard ke kaasni paazeb bajaati nikle
Jis ghadi seenon mein doobe huwe dil
Aastinon mein nihaan haathon ki rah takne lagein
Aas liye
Aur bachchon ke bilakne ki tarah qulqul-e mai
Bahr-e naasoodagi machle toh manaaye na mane
Jab koi ‘baat banaaye na bane’
Jab na koi baat chale
Jis ghadi raat chale
Jis ghadi maatami sunsaan siyah raat chale
Paas raho
Mere qaatil mere dildaar mere paas raho
~
36. Manzar (2)
Rahguzar saaye shajar manzil-o dar halqa-e baam
Baam par seena-e mehtaab khula aahista
Jis tarah khole koi band-e qaba aahista
Halqa-e baam tale saayon ka thehra hua neel
Neel ki jheel
Jheel mein chupke se taira kisi patte ka habaab
Ek pal taira chala phoot gaya aahista
Bahut aahista bahut halka khunuk rang-e sharaab
Mere sheeshe mein dhala aahista
Sheesha-o jaam suraahi tere haathon ke gulaab
Jis tarah door kisi khwaab ka naqsh
Aap hi aap bana aur mita aahista
Dil ne dohraaya koi harf-e wafa aahista
Tumne kaha
Aahista
Chaand ne jhuk-ke kaha
Aur zara aahista
~
37. Yahan Se Shahr Ko Dekho
Yahan se shahr ko dekho toh halqa dar halqa
Khinchi hai jel ki soorat har ek simt faseel