Appendix
Urdu Transliteration of the Poems
1. Ek Manzar (1)
Baam-o dar khamoshi ke bojh se choor
Aasmaanon se ju-e dard rawaan
Chaand ka dukh bhara fasaana-e noor
Shahraahon ki khaak mein ghaltaan
Khwaabgaahon mein neem taareeki
Muzmahil lai rubaab-e hasti ki
Halke halke suron mein nauha kunaan
~
2. Mujhse Pehli Si Muhabbat Meri Mehboob Na Maang
Mujhse pehli si muhabbat meri mehboob na maang
Maine samjha ki tu hai toh darakhshaan hai hayaat
Tera gham hai toh gham-e dahr ka jhagda kya hai
Teri soorat se hai aalam mein bahaaron ko sabaat
Teri aankhon ke siva duniya mein rakkha kya hai?
Tu jo mil jaaye toh taqdeer nigoon ho jaaye
Yun na tha maine faqat chaaha tha yun ho jaaye
Aur bhi dukh hain zamaane mein muhabbat ke siva
Raahatein aur bhi hain wasl ki raahat ke siva
Anginat sadiyon ke taareek bahimaana tilism
Resham-o atlas-o kamkhwaab mein bunwaaye huwe
Ja baja koocha-o bazaar mein bikte huwe jism
Khaak mein lithde huwe khoon mein nehlaaye huwe
Laut jaati hai idhar ko bhi nazar kya kije
Ab bhi dilkash hai tera husn magar kya kije
Aur bhi dukh hain zamaane mein muhabbat ke siva
Raahatein aur bhi hain wasl ki raahat ke siva
Mujhse pehli si muhabbat meri mehboob na maang
~
3. Donon Jahaan Teri Muhabbat Mein Haar Ke
Donon jahaan teri muhabbat mein haar ke
Woh ja raha hai koi shab-e gham guzaar ke
Veeraan hai maikada khum-o saagar udaas hain
Tum kya gaye ki rooth gaye din bahaar ke
Ik fursat-e gunaah mili woh bhi chaar din
Dekhe hain humne hausle parvardigaar ke
Duniya ne teri yaad se begaana kar diya
Tujhse bhi dil fareb hain gham rozgaar ke
Bhoole se muskura toh diye thhe woh aaj Faiz
Mat poochh valvale dil-e naakarda kaar ke
~
4. Tanhaai
Phir koi aaya dil-e zaar nahin koi nahin
Raah-rau hoga kahin aur chala jaayega
Dhal chuki raat bikharne laga taaron ka ghubaar
Ladkhadaane lage aiwaanon mein khwaabeedah charaagh
So gayi rasta tak tak ke har ik raahguzaar
Ajnabi khaak ne dhundla diye kadmon ke suraagh
Gul karo shamaein badha do mai-o mina-o ayaagh
Apne be-khwaab kiwaadon ko muqaffal kar lo
Ab yahan koi nahin koi nahin aayega
~
5. Chand Roz Aur Meri Jaan
Chand roz aur meri jaan faqat chand hi roz
Zulm ki chhaaon mein dum lene pe majboor hain hum
Aur kuchh der sitam seh lein tadap lein ro lein
Apne ajdaad ki meeraas hai maazoor hain hum
Jism par qaid hai jazbaat pe zanjeerein hain
Fikr mehboos hai guftaar pe taazeerein hain
Apni himmat hai ki hum phir bhi jiye jaate hain
Zindagi kya kisi muflis ki qaba hai jis mein
Har ghadi dard ke paiwand lage jaate hain
Lekin ab zulm ki miyaad ke din thode hain
Ek zara sabr ki fariyaad ke din thode hain
Arsa-e dahr ki jhulsi hui veeraani mein
Humko rehna hai pe yun hi toh nahin rehna hai
Ajnabi haathon ka be-naam giraanbaar sitam
Aaj sehna hai hamesha toh nahin sehna hai
Yeh tere husn se lipti hui aalaam ki gard
Apni do-roza jawaani ki shikaston ka shumaar
Chaandni raaton ka bekaar dehekta hua dard
Dil ki be-soodh tadap jism ki maayoos pukaar
Chand roz aur meri jaan faqat chand hi roz
~
6. Marg-e Soz-e Muhabbat
Aao ki marg-e soz-e muhabbat manaayein hu
Aao ki husn-e maah se dil ko jalaayein hum
Khush hon firaaq-e qaamat-o rukhsaar-e yaar se
Sarv-o gul-o saman se nazar ko sataayein hum
Veeraani-e hayaat ko veeraan tar karein
Le naaseh aaj tera kaha maan jaayein hum
Phir ot leke daaman-e abr-e bahaar ki
Dil ko manaayein hum kabhi aansu bahaayein hum
Suljhaayein be-dili se yeh uljhe huwe sawaal
Wahan jaayein ya na jaayein na jaayein ki jaayein hum
Phir dil ko paas-e zabt ki talqeen kar chukein
Aur imtehaan-e zabt se phir ji churaayein hum
Aao ki aaj khatm hui daastaan-e ishq
Ab khatm-e aashiqi ke fasaane sunaayein hum
~
7. Bol
Bol ki lab azaad hain tere
Bol zabaan ab tak teri hai
Tera sutvaan jism hai tera
Bol ki jaan ab tak teri hai
Dekh ki aahan-gar ki dukaan mein
Tund hain shole surkh hai aahan
Khulne lage quflon ke dahaane
Phaila har ik zanjeer ka daaman
Bol yeh thoda waqt bahut hai
Jism-o zabaan ki maut se pehle
Bol ki sach zinda hai ab tak
Bol jo kuchh kehna hai keh le
~
8. Iqbal
Aaya hamaare des mein ik khush-nawa faqir
Aaya aur apni dhun mein ghazal-khwaan guzar gaya
Sunsaan raahein khalq se aabaad ho gayin
Veeraan maikadon ka naseeba sanvar gaya
Thiin chand hi nigaahein jo uss tak pahunch sakin
Par uska geet sabke dilon mein utar gaya
Ab door ja chuka hai woh shah-e gada-numa
Aur phir se apne des ki raahein udaas hain
Chand ik ko yaad hai koi uski ada-e khaas
Do ik nigaahein chand azeezon ke paas hain
Par uska geet sabke dilon mein muqeem hai
Aur uski lai se sainkdon lazzat shanaas hain
Uss geet ke tamaam muhaasin hain la-zavaal
Uska vafoor uska kharosh uska soz-o saaz
Yeh geet misl-e shola-e javvaala tund-o tez
Uski lapak se baad-e fana ka jigar gudaaz
Jaise charaagh vahshat-e sar sar se be-khatar
Ya shamm-e bazm subh ki aamad se be-khabar
~
9. Shahraah
Ek afsurda shahraah hai daraaz
Door ufuq par nazar jamaaye huwe
Sard mitti pe apne seene ke
Surmagin husn ko bichhaaye huwe
Jis tarah koi gham-zada aurat
Apne veeraankade mein mahv-e khayaal
Wasl-e mehboob ke tasavvur mein
Mu ba mu choor uzv uzv nidhaal
~
10. Nazm
Mata-e Lauh-o Qalam
Mata-e lauh-o qalam chhin gai toh kya gham hai
Ki khoon-e dil mein dubo li hain ungliyaan maine
Zabaan pe mohr lagi hai toh kya ki rakh di hai
Har ek halqa-e zanjeer mein zabaan maine
~
11. Mere Humdum Mere Dost
Gar mujhe iska yaqeen ho mere humdum mere dost
Gar mujhe iska yaqeen ho ki tere dil ki thakan
Teri aankhon ki udaasi tere seene ki jalan
Meri diljooi mere pyaar se mit jaayegi
Gar mera harf-e tasalli woh dawa ho jis se
Ji uthe phir tera ujda hua be-noor dimaagh
Teri peshaani se dhul jaayein yeh tazleel ke daagh
Teri bimaar jawaani ko shifa ho jaaye
Gar mujhe iska yaqeen ho mere humdum mere dost
Roz-o shab shaam-o seher main tujhe behlaata rahun
Main tujhe geet sunaata rahun halke sheereen
Aabshaaron ke bahaaron ke chaman zaaron ke geet
Aamad-e subh ke mehtaab ke sayyaaron ke geet
Tujhse main husn-o muhabbat ki hikayaat kahun
Kaise maghroor hasinaon ke barfaab se jism
Garm haathon ki haraarat
mein pighal jaate hain
Kaise ik chehre ke thehre huwe maanoos naqoosh
Dekhte dekhte yak-lakht badal jaate hain
Kis tarah aariz-e mehboob ka shaffaaf billoor
Yak-bayak baada-e ahmar se dahak jaata hai
Kaise gulchhin ke liye jhukti hai khud shaakh-e gulaab
Kis tarah raat ka aiwaan mehak jaata hai
Yun hi gaata rahun gaata rahun teri khaatir
Geet bunta rahun baitha rahun teri khaatir
Par mere geet tere dukh ka mudaawa hi nahin
Naghma jarraah nahin mooniis-o ghamkhwaar sahi
Geet nashtar toh nahin marham-e aazaar sahi
Tere aazaar ka chaara nahin nashtar ke siva
Aur yeh saffaak maseeha mere qabze mein nahin
Iss jahaan ke kisi zi-rooh ke qabze mein nahin
Haan magar tere siva tere siva tere siva
~
12. Subh-e Azaadi
Yeh daagh daagh ujaala yeh shab-gazeda seher
Woh intezaar tha jiska yeh woh seher toh nahin
Yeh woh seher toh nahin jiski aarzu le kar
Falak ke dasht mein taaron ki aakhri manzil
Kahin toh hoga shab-e sust mauj ka saahil
Kahin toh jaake rukega safeena-e gham-e dil
Jawaan lahu ki pur asraar shahraahon se
Chale jo yaar toh daaman pe kitne haath pade
Dayaar-e husn ki be-sabr khwaabgaahon se
Pukaarti rahin baahein badan bulaate rahe
Bahut azeez thi lekin rukh-e seher ki lagan
Bahut qareen tha haseena-e noor ka daaman
Subuk subuk thi tamanna dabi dabi thi thakan
Suna hai ho bhi chuka hai firaaq-e zulmat-o noor
Suna hai ho bhi chuka hai wisaal-e manzil-o gaam
Badal chuka hai bahut ahl-e dard ka dastoor
Nishaat-e wasl halaal-o azaab-e hijr haraam
Jigar ki aag nazar ki umang dil ki jalan
Kisi pe chaara-e hijraan ka kuchh asar hi nahin
Kahan se aayi nigaar-e saba kidhar ko gayi
Abhi charaagh-e sar-e rah ko kuchh khabar hi nahin
Abhi giraani-e shab mein kami nahin aayi
Najaat-e deeda-o dil ki ghadi nahin aayi
Chale chalo ki woh manzil abhi nahin aayi
~
13. Lauh-o Qalam
Hum parvarish-e lauh-o qalam karte rahenge
Jo dil pe guzarti hai raqam karte rahenge
Asbaab-e gham-e ishq baham karte rahenge
Veeraani-e dauraan pe karam karte rahenge
Haan talkhi-e ayyaam abhi aur badhegi
Haan ahl-e sitam mashq-e sitam karte rahenge
Manzoor yeh talkhi yeh sitam humko gawaara
Dum hai toh mudaawa-e alam karte rahenge
Maikhaana salaamat hai toh hum surkhi-e mai se
Taz-in-e dar-o baam-e haram karte rahenge
Baaki hai lahu dil mein toh har ashk se paida
Rang-e lab-o rukhsaar-e sanam karte rahenge
Ik tarz-e taghaaful hai so woh unko mubaarak
Ik arz-e tamanna hai so hum karte rahenge
~
14. Tumhaari Yaad Ke Jab Zakhm Bharne Lagte Hain
Tumhaari yaad ke jab zakhm bharne lagte hain
Kisi bahaane tumhein yaad karne lagte hain
Hadees-e yaar ke unvaan nikharne lagte hain
Toh har hareem mein gesu sanvarne lagte hain
Har ajnabi humein mehram dikhaayi deta hai
Jo ab bhi teri gali se guzarne lagte hain
Saba se karte hain ghurbat naseeb zikr-e vatan
Toh chashm-e subh mein aansu ubharne lagte hain
Woh jab bhi karte hain iss nutq-o lab ki bakhiya-gari
Fiza mein aur bhi naghme bikharne lagte hain
Dar-e qafas pe andhere ki mohr lagti hai
Toh Faiz dil mein sitaare utarne lagte hain
~
15. Tumhaare Husn Ke Naam
Salaam likhta hai shaayar tumhaare husn ke naam
Bikhar gaya jo kabhi rang-e pairahan sar-e baam
Nikhar gayi hai kabhi subh dopahr kabhi shaam
Kahin jo qaamat-e zeba pe saj gayi hai qaba
Chaman mein sarv-o sanobar sanwar gaye hain tamaam
Bani bisaat-e ghazal jab dubo liye dil ne
Tumhaare saaya-e rukhsaar-o lab mein saagar-o jaam
Salaam likhta hai shaayar tumhaare husn ke naam
Tumhaare haath pe hai taabish-e hina jab tak
Jahaan mein baaki hai dildaari-e uroos-e sukhan
Tumhaara husn jawaan hai toh mehrbaan hai falak
Tumhaara dum hai toh dumsaaz hai hawa-e watan
Agarche tang hain auqaat sakht hain aalaam
Tumhaari yaad se sheereen hai talkhi-e ayyaam
Salaam likhta hai shaayar tumhaare husn ke naam
~
16. Rang Pairaahan Ka Khushbu Zulf Lehraane Ka Naam
Rang pairaahan ka khushbu zulf lehraane ka naam
Mausam-e gul hai tumhaare baam par aane ka naam
Doston uss chashm-o lab ki kuchh kaho jiske baghair
Gulsitaan ki baat rangeen hai na maikhaane ka naam
Phir nazar mein phool mehke dil mein phir shammein jalin
~
17. Dil Mein Ab Yun Tere Bhoole Huwe Gham Aate Hain
Dil mein ab yun tere bhoole huwe gham aate hain
Jaise bichhde huwe kaabe mein sanam aate hain
Ek ek karke huwe jaate hain taare raushan
Meri manzil ki taraf tere qadam aate hain
Raqs-e mai tez karo saaz ki lai tez karo
Su-e maikhaana safeeraan-e haram aate hain
Kuchh humin ko nahin ehsaan uthaane ka dimaagh
Woh toh jab aate hain ma’il ba-karam aate hain
Aur kuchh der na guzre shab-e furqat se kaho
Dil bhi kam dukhta hai woh yaad bhi kam aate hain
~
18. Sheeshon Ka Maseeha Koi Nahin
Jo toot gaya so toot gaya
Kab ashkon se jud sakta hai
Jo toot gaya so chhoot gaya
Tum naahaq tukde chun chun kar
Daaman mein chhipaaye baithe ho
Sheeshon ka maseeha koi nahin
Kya aas lagaaye baithe ho
Shaayad ki inhin tukdon mein kahin
Woh saagar-e dil hai jis mein kabhi
Sad naaz se utra karti thi
Sahba-e gham-e jaanaan ki pari
Phir duniya waalon ne tumse
Yeh saagar le kar phod diya
Jo mai thi baha di mitti mein
Mehmaan ka shahpar tod diya
Yeh rangeen reze hain shaayad
Un shokh bilori sapnon ke
Tum mast jawaani mein jin se
Khalwat ko sajaaya karte thhe
Naadaari daftar bhookh aur gham
In sapnon se takraate rahe
Be-raham tha chaumukh pathrao
Yeh kaanch ke dhaanche kya karte
Ya shaayad in zarron mein kahin
Moti hai tumhaari izzat ka
Woh jis se tumhaare ijz pe bhi
Shamshaad qadon ne rashk kiya
Iss maal ki dhun mein phirte thhe
Taajir bhi bahut rahzan bhi kayi
Hai chor nagar yaan muflis ki
Gar jaan bachi toh aan gayi
Yeh saagar sheeshe laal-o guhar
Saalim hon toh qeemat paate hain
Yun tukde tukde hon toh faqat
Chubhte hain lahu rulvaate hain
Tum naahaq sheeshe chun chun kar
Daaman mein chhipaaye baithe ho
Sheeshon ka maseeha koi nahin
Kya aas lagaaye baithe ho
Yaadon ke girebaanon ke rafu
Par dil ki guzar kab hoti hai
Ek bakhiya udhera ek siya
Yun umr basar kab hoti hai
Iss kaar gah-e hasti mein jahan
Yeh saagar sheeshe dhalte hain
Har shai ka badal mil
sakta hai
Sab daaman pur ho sakte hain
Jo haath badhe yaawar hai yahan
Jo aankh uthe woh bakhtaawar
Yahan dhan daulat ka ant nahin
Hon ghaat mein daaku laakh magar
Kab loot jhapat se hasti ki
Dukaanein khaali hoti hain
Yahan parbat parbat heere hain
Yahan saagar saagar moti hain
Kuchh log hain jo iss daulat par
Parde latkaate phirte hain
Har parbat ko har saagar ko
Neelaam chadhaate phirte hain
Kuchh woh bhi hain jo lad bhid kar
Yeh parde noch giraate hain
Hasti ke uthai geeron ki
Har chaal uljhaaye jaate hain
In donon mein rann padta hai
Nit basti basti nagar nagar
Har baste ghar ke seene mein
Har chalti raah ke maathe par
Yeh kaalik bharte phirte hain
Woh jot jaagate rehte hain
Yeh aag lagaate phirte hain
Woh aag bujhaate rehte hain
Sab saagar sheeshe laal-o guhar
Iss baazi mein badd jaate hain
Uthao sab khaali haathon ko
Iss rann se bulaave aate hain
~
19. Aaye Kuchh Abr Kuchh Sharaab Aaye
Aaye kuchh abr kuchh sharaab aaye
Iske baad aaye jo azaab aaye
Baam-e meena se mahtaab utre
Dast-e saaqi mein aftaab aaye
Har rag-e khoon mein phir charaaghan ho
Saamne phir woh be-naqaab aaye
Umr ke har varq pe dil ko nazar
Teri mehr-o wafa ke baab aaye
Kar raha tha gham-e jahaan ka hisaab