Har ek raahguzaar gardish-e aseeran hai
Na sang-e mil na manzil na mukhlisi ki sabeel
Jo koi tez chale rah toh puchhta hai khayaal
Ki tokne koi lalkaar kyun nahin aayi
Jo koi haath hilaaye toh wahm ko hai sawaal
Koi chhanak koi jhankaar kyun nahin aayi
Yahan se shahr ko dekho toh saari khalqat mein
Na koi saahib-e tamkeen na koi waali-e hosh
Har ek mard-e jawaan mujrim-e rasan ba-gulu
Har ik haseena-e rana kaneez-e halqa bagosh
Jo saaye door charaaghon ke gird larzaan hain
Na jaane mehfil-e gham hai ki bazm-e jaam-o sabu
Jo rang har dar-o deewar par pareshaan hain
Yahan se kuchh nahin khulta yeh phool hain ki lahu
~
38. Kis Harf Pe Tu-ne Gosha-e Lab Ay Jaan-e Jahaan Ghammaaz Kiya
Kis harf pe tu-ne gosha-e lab ay jaan-e jahaan ghammaaz kiya
Ailaan-e junoon dil waalon ne ab ke ba-hazaar andaaz kiya
Sau paikaan thhe paiwast-e gulu jab chhedi shauq ki lai humne
Sau teer taraazu thhe dil mein jab humne raqs aaghaaz kiya
Be-hirs-o hawa be-khauf-o khatar iss haath pe sar uss kaf pe jigar
Yun ku-e sanam mein waqt-e safar nazaara-e baam-e naaz kiya
Jis khaak mein mil kar khaak huwe woh surma-e chashm-e khalq bani
Jis khaar pe humne khoon chhidka hamrang-e gul-e tannaaz kiya
Lo wasl ki sa-at aa pahunchi phir hukm-e huzoori par humne
Aankhon ke dareeche band kiye aur seene ka dar baz kiya
~
39. Deewaar-e Shab Aur Aks-e Rukh-e Yaar Saamne
Deewaar-e shab aur aks-e rukh-e yaar saamne
Phir dil ke aaine se lahu phootne laga
Phir waz-e ihtiyaat se dhundla gayi nazar
Phir zabt-e aarzu se badan tootne laga
~
40. Kiye Aarzu Se Paimaan Jo Ma’al Tak Na Pahunche
Kiye aarzu se paimaan jo ma’al tak na pahunche
Shab-o roz-e aashnaai mah-o saal tak na pahunche
Woh nazar baham na pahunchi ki muheet-e husn karte
Teri deed ke waseele khad-o khaal tak na pahunche
Wahi chashma-e baqa tha jisse sab saraab samjhe
Wahi khwaab motabar thhe jo khayaal tak na pahunche
Tera lutf vajh-e taskeen na qaraar sharh-e gham se
Ki hain dil mein woh gile bhi jo malaal tak na pahunche
Koi yaar jaan se guzra koi hosh se na guzra
Yeh nadeem-e yak-do saagar mere haal tak na pahunche
Chalo Faiz dil jalaayein karein phir se arz-e jaanan
Woh sukhan jo lab tak aaye par sawaal tak na pahunche
~
41. Dua
Aaiye haath uthaayein hum bhi
Hum jinhein rasm-e dua yaad nahin
Hum jinhein soz-e muhabbat ke siva
Koi bhut koi khuda yaad nahin
Aaiye arz guzaarein ki nigaar-e hasti
Zahr-e imroz mein sheereeni-e farda bhar de
Woh jinhein taab-e giraanbaari-e ayyaam nahin
Unki palkon pe shab-o roz ko halka kar de
Jinki aankhon ko rukh-e subh ka yaara bhi nahin
Unki raaton mein koi shama munawwar kar de
Jinke qadmon ko kisi rah ka sahaara bhi nahin
Unki nazron pe koi raah ujaagar kar de
Jinka deen pairvi-e kizb-o riya hai unko
Himmat-e kufr mile jurrat-e tahqeeq mile
Jinke sar muntazir-e tegh-e jafa hain unko
Dast-e qaatil ko jhatak dene ki taufeeq mile
Ishq ka sirr-e nihaan jaan tapan hai jisse
Aaj iqraar karein aur tapish mit jaaye
Harf-e haq dil mein khatakta hai jo kaante ki tarah
Aaj izhaar karein aur khalish mit jaaye
~
42. Sharh-e Bedardi-e Haalaat Na Hone Paayi
Sharh-e bedardi-e haalat na hone paayi
Ab ke bhi dil ki madaaraat na hone paayi
Phir wohi waada jo iqraar na banne paaya
Phir wahi baat jo isbaat na hone paayi
Phir woh parwaane jinhein izn-e shahaadat na mila
Phir woh shammein ki jinhein raat na hone paayi
Phir wahi jaan balabi lazzat-e mai se pehle
Phir woh mehfil jo kharabaat na hone paayi
Phir dum-e deed rahe chashm-o nazar deed talab
Phir shab-e wasl mulaqaat na hone paayi
Phir wahan baab-e asar jaaniye kab band hua
Phir yahan khatm munajaat na hone paayi
Faiz sar par jo har ik roz qayaamat guzri
Ek bhi roz-e makafaat na hone paayi
~
43. Jis Roz Qaza Aayegi
Kis tarah aayegi jis roz qaza aayegi
Shaayad iss tarah ki jis taur kabhi awwal-e shab
Be-talab pehle pahal marhamat-e bosa-e lab
Jisse khulne lagein har simt tilismaat ke dar
Aur kahin door se anjaan gulaabon ki bahaar
Yak ba yak seena-e mehtaab ko tadpaane lage
Shaayad iss tarah ki jis taur kabhi aakhir-e shab
Neem wa kaliyon se sarsabz seher
Yak ba yak hujra-e mehboob mein lehraane lage
Aur khamosh dareechon se ba-hangaam-e raheel
Jhanjhanaate huwe taaron ki sada aane lage
Kis tarah aayegi jis roz qaza aayegi
Shaayad iss tarah ki jis taur tah-e nok-e sinan
Koi rag waahima-e dard se chillaane lage
Aur qazzaaq-e sinaan-dast ka dhundla saaya
Az karaan ta ba karaan dahr pe mandlaane lage
Kis tarah aayegi jis roz qaza aayegi
Khwaah qaatil ki tarah aaye ki mehboob sifat
Dil se bas hogi yahi harf-e vida ki soorat
Lillaah-il hamd ba anjaam-e dil-e dil zadagaan
Kalma-e shukr ba naam-e lab-e sheereen dahnaan
~
44. Ashkabad Ki Ek Shaam
Jab sooraj ne jaate jaate
Ashkabad ke neele ufuq se
Apne sunehri jaam
Mein dhaali
Surkhi-e awwal-e shaam
Aur yeh jaam
Tumhaare saamne rakh kar
Tumse kiya kalaam
Kaha
Parnaam utho
Aur apne tan ki sej se uth kar
Ik sheereen paighaam
Sabt karo iss shaam
Kisi ke naam
Kinaar-e jaam
Shaayad tum yeh maan gayin aur tumne
Apne lab-e gulfaam
Kiye inaam
Kisi ke naam
Kinaar-e jaam
Ya shaayad
Tum apne tan ki sej pe saj kar
Thiin yun mahv-e aaraam
Ki raste takte takte
Bujh gayi shamm-e jaam
Ashkabad ke neele ufaq par
Ghaarat ho gayi shaam
~
45. Mere Dard Ko Jo Zubaan Mile
Mera dard naghma-e be-sada
Meri zaat zarra-e be-nishaan
Mere dard ko jo zubaan mile
Mujhe apna naam-o nishaan mile
Meri zaat ka jo nishaan mile
Mujhe raaz-e nazm-e jahaan mile
Jo mujhe yeh raaz-e nihaan mile
Meri khamoshi ko bayaan mile
Mujhe kayanaat ki sarwari
Mujhe daulat-e do jahaan mile
~
46. Ay Shaam Meherbaan Ho
Ay shaam meherbaan ho
Ay shaam-e shahr-e yaaraan
Hum pe meherbaan ho
Dozakhi dopahr sitam ki
Be-sabab sitam ki
Dopahr dard-o ghaiz-o gham ki
Be-zabaan dard-o ghaiz-o gham ki
Iss dozakhi dopahr ke taaziyaane
Aaj tan par dhanak ki soorat
Qaus dar qaus bat gaye hain
Zakhm sab khul gaye hain jinke
Daagh jaana tha chhut gaye hain
Tere toshe mein kuchh toh hoga
Marham-e dard ka doshaala
Tan ke uss ang par udha de
Dard sab se siva jahan ho
Ay shaam meherbaan ho
Ay shaam-e shahr-e yaaraan
Hum pe meherbaan ho
Dozakhi dasht nafraton ke
Bedard nafraton ke
Kirchiyaan deeda-e hasad ki
Khas-o khaashaak ranjishon ke
Itni sunsaan shahraahein
Itni gunjaan qatl gaahein
Jin se aaye hain hum guzar kar
Aabla ban ke har qadam par
Yun paon kat gaye hain
Raste simat gaye hain
Makhmalin apne baadalon ki
Aaj paon tale bichha de
Shaafi-e karb-e rahrawaan ho
Ay shaam meherbaan ho
Ay mah-e shab-e nigaaraan
Ay rafeeq-e dil-figaaraan
Iss shaam hum zubaan ho
Ay shaam meherbaan ho
Ay shaam meherbaan ho
Ay shaam-e shahr-e yaaraan
Hum pe meherbaan ho
~
47. Na Ab Raqeeb Na Naasih Na Ghamgusaar Koi
Na ab raqeeb na naasih na ghamgusaar koi
Tum aashna thhe toh thiin aashnaiyan kya kya
Juda thhe hum toh mayassar thiin qurbatein kitni
Baham huwe toh padi hain judaaiyaan kya kya
Pahunch ke dar pe tere kitne motabar thehre
Agarche raah mein huin jag hansaaiyaan kya kya
Hum aise sada dilon ki niyaaz mandi se
Buton ne ki hain jahaan mein khudaaiyaan kya kya
Sitam pe khush kabhi lutf-o karam se ranjeeda
Sikhaayin tumne hamein kaj adaaiyaan kya kya
~
48. Dhaka Se Waapsi Par
Hum ki thehre ajnabi itni madaaraaton ke baad
Phir banenge aashna kitni mulaqaaton ke baad
Kab nazar mein aayegi be-daagh sabze ki bahaar
Khoon ke dhabbe dhulenge kitni barsaaton ke baad
Thhe bahut bedard lamhe khatm-e dard-e ishq ke
Thiin bahut be-mehr subhein meherbaan raaton ke baad
Dil toh chaaha par shikast-e dil ne muhlat hi na di
Kuchh gile shikwe bhi kar lete munaajaaton ke baad
Unse jo kehne gaye thhe Faiz jaan sadqa kiye
Ankahi hi reh gayi woh baat sab baaton ke baad
~
49. Tum Apni Karni Kar Guzro
Ab kyun uss din ka zikr karo
Jab dil tukde ho jaayega
Aur saare gham mit jaayenge
Jo kuchh paaya kho jaayega
Jo mil na saka woh paayenge
Yeh din toh wohi pehla din hai
Jo pehla din tha chaahat ka
Hum jiski tamanna karte rahe
Aur jis se har dum darte rahe
Yeh din toh kitni baar aaya
Sau baar basse aur ujad gaye
Sau baar lute aur bhar paaya
Ab kyun uss din ki fikr karo
Jab dil tukde ho jaayega
Aur saare gham mit jaayenge
Tum khauf-o khatar se dar guzro
Jo hona hai so hona hai
Gar hansna hai toh hansna hai
Gar rona hai toh rona hai
Tum apni karni kar guzro
Jo hoga dekha jaayega
~
50. Kuchh Ishq Kiya Kuchh Kaam Kiya
Woh log bahut khush-qismat thhe
Jo ishq ko kaam samajhte thhe
Ya kaam se aashiqi karte thhe
Hum jeete ji masroof rahe
Kuchh ishq kiya kuchh kaam kiya
Kaam ishq ke aade aata raha
Aur ishq se kaam ulajhta raha
Phir aakhir tang aa kar humne
Donon ko adhoora chhod diya
~
51. Aaj Ek Harf Ko Phir Dhoondta Phirta Hai Khayaal
(1)
Aaj ik harf ko phir dhoondta phirta hai khayaal
Madh bhara harf koi zahr bhara harf koi
Dil nasheen harf koi qahr bhara harf koi
Harf-e ulfat koi dildaar nazar ho jaise
Jisse milti hai nazar bosa-e lab ki soorat
Itna raushan ki sar-e mauja-e zar ho jaise
Sohbat-e yaar mein aaghaaz-e tarab ki soorat
Harf-e nafrat koi shamsheer-e ghazab ho jaise
Ta abad shahr-e sitam jisse tabaah ho jaayein
Itna taareek ki shamshaan ki shab ho jaise
Lab pe laaun toh mere hont siyah ho jaayein
(2)
Aaj har sur se har ik raag ka naata toota
Dhoondti phirti hai mutrib ko phir uski aawaz
Joshish-e dard se majnun ke garebaan ki tarah
Chaak dar chaak hua aaj har ik parda-e saaz
Aaj har mauj-e hawa se hai sawaali khalqat
La koi naghma koi saut teri umr daraaz
Nauha-e gham hi sahi shor-e shahaadat hi sahi
Soor-e mahshar hi sahi baang-e qayaamat hi sahi
~
52. Dil-e Mann Musaafir-e Mann
Mere dil mere musaafir
Hua phir se hukm saadir
Ki watan badar hon hum tum
Dein gali gali sadaein
Karein rukh nagar nagar ka
Ki suraagh koi paayein
Kisi yaar-e naama bar ka
Har ek ajnabi se poochhein
Jo pata tha apne ghar ka
Sar-e ku-e na-ashnaayaan
Kabhi isse baat karna
Kabhi usse baat karna
Tumhein kya kahun ki kya hai
‘Shab-e gham buri bala hai’
Humein yeh bhi tha ghaneemat
Jo koi shumaar hota
‘Humein kya bura tha marna
Agar ek baar hota’
~
53. Manzar (3)
Aasmaan aaj ik bahr-e pur shor hai
Jis mein har su rawaan baadalon ke jahaaz
Unke arshe pe kirnon ke mastool hain
Baadbaanon ke pehne huwe farghulein
Neel mein gumbadon ke jazeere kayi
Ek baazi mein masroof hai har koi
Abaabeel koi nahaati hui
Koi cheel ghote mein jaati hui
Koi taaqat nahin iss mein zor aazma
Koi beda nahin hai kisi mulk ka
Iski tah mein koi aabdozin nahin
Koi rocket nahin koi topein nahin
Yun toh saare anaasir hain yahan zor mein
Amn kitna hai iss bahr-e pur shor mein
~
54. Nazr-e Haafiz
Naaseham guft bajuz gham che hunar daarad ishq
Birau ay khwaaja-e aaqil hunare behtar azeen
(Haafiz)
Qand-e dahan kuchh isse zyaada
Lutf-e sukhan kuchh isse zyaada
Fasl-e khizaan mein lutf-e bahaaraan
Barg-e saman kuchh isse zyaada
Haal-e chaman par talkh-nawaayi
Murgh-e chaman kuchh isse zyaada
Dil shikani bhi dildaari bhi
Yaad-e watan kuchh isse zyaada
Shamm-e badan faanoos-e qaba mein
Khoobi-e tan kuchh isse zyaada
Ishq mein kya hai gham ke ilaawa
Khwaaja-e mann kuchh isse zyaada
~
55. Sitam Sikhlaayega Rasm-e Wafa Aise Nahin Hota
Sitam sikhlaayega rasm-e wafa aise nahin hota
Sanam dikhlaaenge raah-e khuda aise nahin hota
Gino sab hasratein jo khoon hui hain tan ke maqtal mein
Mere qaatil hisaab-e khoon baha aise nahin hota
Jahaan-e dil mein kaam aati hain tadbeerein na taazeerein
Yahan paimaan-e tasleem-o reza aise nahin hota
Har ik shab har ghadi guzre qayaamat yun toh hota hai
Magar har subh ho roz-e jaza aise nahin hota
Rawaan hai nabz-e dauraan gardishon mein aasmaan saare
Jo tum kehte ho sab kuchh ho chuka aise nahin hota
~
56. Hijr Ki Raakh Aur Wisaal Ke Phool
Aaj phir dard-o gham ke dhaage mein
Hum piro k
ar tere khayaal ke phool
Tark-e ulfat ke dasht se chun kar
Aashnaayi ke maah-o saal ke phool
Teri dehleez par saja aaye
Phir teri yaad par chadha aaye
Baandh kar aarzu ke palle mein
Hijr ki raakh aur wisaal ke phool
~
57. Nazr-e Maulana Hasrat Mohani
Mar jaayenge zaalim ki himaayat na karenge
Ahraar kabhi tark-e riwaayat na karenge
Kya kuchh na mila hai jo kabhi tujhse mile thhe
Ab tere na milne ki shikaayat na karenge
Shab beet gayi hai toh guzar jaayega din bhi
Har lehza jo guzri woh hikaayat na karenge
Yeh faqr-e dil-e zaar ka iwzaana bahut hai
Shaahi nahin maangenge wilaayat na karenge
Hum sheikh na leader na musaahib na sahaafi
Jo khud nahin karte woh hidaayat na karenge
~
THE BEGINNING
Let the conversation begin…
Follow the Penguin Twitter.com@penguinbooks
Keep up-to-date with all our stories YouTube.com/penguinbooks
Pin ‘Penguin Books’ to your Pinterest
Like ‘Penguin Books’ on Facebook.com/penguinbooks
Find out more about the author and
discover more stories like this at Penguin.co.in
PENGUIN BOOKS
UK | Canada | Ireland | Australia
New Zealand | India | South Africa
Penguin Books is part of the Penguin Random House group of companies whose addresses can be found at global.penguinrandomhouse.com.
This collection published 2017
Copyright © Faiz Foundation 2017
The moral right of the author has been asserted
Jacket images © Ahlawat Gunjan